ហូឡង់៖ បុរសម្នាក់ដែលបានធ្វើការវាយប្រហារទៅលើអ្នកចាំទីរបស់ក្លិបបាល់ទាត់ Sevilla អំឡុងការប្រកួត Europa League នៅកីឡដ្ឋាន Philips Stadium របស់ក្លិប PSV Eindhoven កាលពីខែមុន ត្រូវបានក្លិបសម្រេចពិន័យមិនឱ្យចូលក្នុងកីឡដ្ឋានរយៈពេល ៤០ឆ្នាំ។ នេះបើតាមសេចក្តីប្រកាសរបស់ក្លិបនៅថ្ងៃអង្គារនេះ។ 

ការប្រកួតនៅ Eindhoven ត្រូវបានផ្អាកបន្ទាប់ពីមានអ្នកគាំទ្របានរត់ចូលទៅលើទីលាន ហើយបានវាយទៅលើអ្នកចាំទី Marko Dmitrovic ដោយដាល់ចំផ្ទៃមុខ មុនពេលដែលអ្នកចាំទីសញ្ជាតិស៊ែបរូបនេះបានផ្តួលបោកគេទៅលើវាលស្មៅ។ 

មិនត្រឹមតែមានការហាមឃាត់មិនឱ្យចូលក្នុងកីឡដ្ឋានរយៈពេល ៤០ឆ្នាំប៉ុណ្ណោះទេ អ្នកគាំទ្រដែលគេដឹងថាមានវ័យ ២០ឆ្នាំរូបនេះក៏ត្រូវបានកាត់ទោសឱ្យជាប់ពន្ធនាគាររយៈពេល ៣ខែ និងព្យួរទោសចំនួនមួយខែដោយតុលាការតំបន់ East Brabant។ 

ក្លិប PSV ក្នុងសេចក្តីថ្លែងការណ៍មួយបានបញ្ជាក់ថា បន្ថែមពីលើការហាមប្រាមចូលក្នុងកីឡដ្ឋានរយៈពេល ៤០ឆ្នាំ ក្លិប PSV ក៏បាននឹងកំពុងចាប់ផ្តើមដំណើរការនីតិវិធីដើម្បីស្ដារការខូចខាតដែលកើតឡើងដោយសារអ្នកគាំទ្ររូបនេះ។ គួរឱ្យដឹងថា អ្នកគាំទ្រខាងលើក៏បានរងបំរាមរួចទៅហើយ ដោយមិនឱ្យចូលទៅក្នុងកីឡដ្ឋានជាតិរហូតដល់ឆ្នាំ២០២៦ ដែលជាបំរាមដាក់ដោយសហព័ន្ធបាល់ទាត់ហូឡង់ ប៉ុន្តែក្លិប PSV បានបញ្ជាក់ថា អ្នកគាំទ្ររូបនេះបានចូលក្នុងកីឡដ្ឋានដោយប្រើប្រាស់សំបុត្រដែលមិត្តភក្តិគេជាអ្នកទិញ។ 

គួរបញ្ជាក់ថា ក្នុងការប្រកួតនៅទឹកដីកីឡដ្ឋាន Philips របស់ក្លិប PSV ក្លិប Sevilla បានបរាជ័យក្នុងលទ្ធផល ២-០ ប៉ុន្តែនៅតែឡើងទៅកាន់វគ្គបន្តដោយលទ្ធផលជ័យជម្នះកាលពីជើងទី១ Sevilla ឈ្នះ ៣-០។ ម្ចាស់ជើងឯក Europa Leauge នេះនឹងជួបជាមួយក្លិប Manchester United នៅវគ្គ ១៦ក្រុមចុងក្រោយ៕